Սաղմոս 102 [101] - Անապատի բվեճին եմ նմանվում

Ա Ա Ա

Այս սաղմոսում միմյանց միանում են տառապանքի խորքն ընկղմված մի հոգու ողբը և աքսորից վերադարձած մի խումբ աղքատների աղոթքը, որոնք սպասում են այն օրվան, երբ կկարողանան վերակառուցել Երուսաղեմի՝ իրենց Սուրբ Քաղաքի պարիսպները: Մարդն ու ամբողջ տիեզերքն անցնում են, միմիայն Աստված է մնում (12-13.26-28). հետևաբար, Նա կարող է նոր կյանքի վերածնունդ պարգևել բզկտված գոյությանը և թալանված քաղաքին: Սա Տիրոջ զորության ապացույցներից մեկն է և Հին Ուխտի ժողովրդի հույսի հիմքն ու հենարանը: Եվ սա վավերական է նաև քրիստոնյաներիս համար, որովհետև մենք գիտենք, որ Աստված Իր ժողովրդի համար մշտնջենավոր բնակություն և օթևան է պատրաստել հանձինս Հիսուսի և Նրա Եկեղեցում, ինչպես ընդգծում է Պողոս Առաքյալը (Եբր 1, 10-12), երբ մեկնաբանում է այս սաղմոսի 26-29 հատվածը:

Կցորդ.		Հիսուս Քրիստոսը նույնն է երեկ և այսօր, նույնն է լինելու նաև հավիտյան (Եբր 13, 8):
կամ.		Ես եմ Ալֆան և Օմեգան, առաջինը և վերջինը, սկիզբը և վերջը (Հյտ 22, 13):
կամ.		Երկինքն ու երկիրը կանցնեն, բայց իմ խոսքերը չեն անցնի (Մրկ 13, 31):
կամ.		Եթե մեր երկրային օթևանը կործանվի, մի օթևան կստանանք Աստծուց (հմմտ. 2Կր 5, 1):

¹Վշտացած հոգու աղոթքը, որ տառապում է և Աստծո առաջ ներկայացնում է իր ողբը:

²Տեր, լսիր իմ աղոթքը,

իմ աղաղակը թող հասնի Քեզ.

³մի՛ թաքցրու ինձնից Քո երեսը,

այն օրը, երբ տրտմության մեջ եմ.

դեպի ինձ խոնարհեցրու ականջդ,

երբ կանչում եմ Քեզ, շուտո՛վ, պատասխանիր ինձ:

⁴Ծխի նման անհետանում են իմ օրերը,

ոսկորներս այրվում են շիկացած ածուխի նման.

⁵սիրտս չորանում է հնձված խոտի պես,

մոռանում եմ ուտել իմ հացը.

⁶երկարատև հեծեծանքներիս պատճառով

մաշկս ոսկորներիս է կպնում:

⁷Նմանվում եմ անապատի բվեճին,

ինչպես ավերակներում թառած մի բու.

⁸գիշերը մնում եմ հսկելու,

միայնակ՝ ինչպես ճնճղուկը տանիքի վրա:

⁹Թշնամիներս ամբողջ օրը նախատում են ինձ,

մոլեգնած՝ անիծում են անձս.

¹⁰մոխիրն է հացը, որ ուտում եմ,

արցունքներ եմ խառնում ըմպելիիս:

¹¹Զայրույթիդ ու բարկությանդ պատճառով,

բարձրացրիր ինձ և վար գցեցիր հողին.

¹²օրերս նման են ստվերին, որ թեքվում է,

և ես թառամում եմ խոտի նման:

***

¹³Բայց Դու, Տեր, թագավորում ես հավետ,

հիշատակդ՝ սերնդից սերունդ.

¹⁴Դու ոտքի կկանգնես, Սիոնին գթալով,

նրա նկատմամբ ողորմություն գործածելու ժամը հասել է.

¹⁵Քո ծառաների համար թանկագին են նրա քարերը,

նրա փոշու հանդեպ սեր են տածում նրանք:

¹⁶Հեթանոսները երկնչելու են Տիրոջ Անունից,

Քո փառքից՝ երկրի բոլոր թագավորները.

¹⁷երբ Տերը կվերականգնի Սիոնը,

երբ այնտեղ կհայտնվի Իր փառքի մեջ,

¹⁸կընդունի խոնարհի աղոթքը,

չարհամարհելով նրա աղաչանքը:

¹⁹Թող սա գրվի գալիք սերնդի համար,

և վերստեղծված ժողովուրդը կգովի Տիրոջը.

²⁰«Սրբության բարձունքից դիտում է Տերը,

երկնքից Նա նայում է երկրի վրա.

²¹լսելու համար բանտարկյալի հեծեծանքը,

ազատելու համար մահվան դատապարտվածներին»:

²²Տիրոջ Անունը մեծարվելու է Սիոնում,

գովաբանվելու է ամբողջ Երուսաղեմով մեկ.

²³երբ ի մի են հավաքվելու ժողովուրդներն ու թագավորությունները,

և միասին ծառայելու են Տիրոջը:

***

²⁴Ճանապարհի ընթացքում նվաղեցրեց իմ ուժը,

համառոտեց թիվն իմ օրերի.

²⁵և ես աղաղակեցի. «Աստվա՜ծ իմ,

մի՛ վերցրու ինձ օրերիս կեսին»:

Քո տարիները հավիտյանս հավիտենից են,

²⁶սկզբում հաստատեցիր երկիրը.

երկինքը Քո ձեռքերի գործն է,

²⁷բայց դրանք կանցնեն, Դու կմնաս.

մաշվում են հյուսվածքի նման,

զգեստների նման Դու կնորոգես դրանք:

²⁸Կնորոգվեն, բայց Դու կմնաս,

Քո տարիներն անվախճան են.

²⁹ծառաներդ մի օթևան կունենան,

նրանց սերունդը կմնա Քո ներկայության:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։