Սաղմոս 31 [30] - Քո ձեռքն եմ հանձնում իմ հոգին

Ա Ա Ա

Իր մտերիմներից լքված և մահվան վտանգին մատնված, սաղմոսերգուն դիմում է Տիրոջը, Նրան է ներկայացնում իր վիշտը և Նրանից օգնություն է խնդրում: Վստահ, որ Տերը լսել է իրեն, օրհնում է Աստծուն և հրապարակավ հռչակում է ստացած պարգևները: Երախտագիտության մատուցումը սաղմոսերգուին առիթ է ընծայում երգելու երջանկությունը նրանց, ովքեր ապավինում են Տիրոջը. Աստված նրանց ընդունում է Իր մոտ և պաշտպանում է նրանց, մինչ գարշում է բոլոր նրանցից, ովքեր կեղծ կուռքեր են պաշտում:

Հիսուսը խաչի վրա աղոթեց գործածելով այս սաղմոսի խոսքերը. «Հայր, Քո ձեռքն եմ հանձնում իմ հոգին» (Ղկս 23, 46): Եվ ուրիշ որևիցէ մեկից ավելի Նա կարող է ասել. «Դու ինձ փրկում ես, Տեր, հավատարիմ Աստված»: Նա Իր իսկ օրինակով հրավիրում է մեզ հուսալու Տիրոջը, ուժեղ լինելու և չվհատվելու: Այս սաղմոսի խոսքերը հատկապես հարմար են Ավագ Ուրբաթ օրը աղոթելու համար, Հիսուսի Չարչարանքների ավետարանական հատվածի ընթերցումից առաջ:

Կցորդ.		Ով տառապում է Աստծո կամքի համաձայն, թող իր կյանքը վստահի հավատարիմ Արարչին (հմմտ. 1Պտ 4, 19):
կամ.		Տեր Հիսուս, ընդունիր իմ հոգին և այս գործը նրանց համար մեղք մի՛ համարիր (հմմտ. Գրծ 7, 59-60):

¹Երգչախմբի ղեկավարի համար: Սաղմոս: Դավթի:

²Քեզ եմ, Տեր, ապավինում,

հավիտյան ամոթով չմնամ.

արդարությամբդ ազատիր ինձ,

³լսիր և շտապիր ինձ օգնության:

Իմ համար ապահով վեմ եղիր,

ամուր մի վայր, որ փրկում է ինձ.

⁴իմ անառիկ ամրոցը Դու ես,

Անվամբդ կողմնորոշիր ինձ ու առաջնորդիր:

⁵Դուրս հանիր ինձ վրաս նետված ցանցից,

քանի որ Դու ես իմ պատսպարանը.

⁶Քո ձեռքն եմ հանձնում իմ հոգին,

Դու ինձ փրկում ես, Տեր, հավատարմության Աստված:

⁷Ես զազրում եմ կուռքերի ոչնչությունը պաշտողներից,

և ընդհակառակն՝ հավատում եմ Տիրոջը.

⁸ցնծալու և ուրախանալու եմ սիրույդ մեջ:

Դու, որ տեսնում ես իմ խոնարհեցումը

և գիտես կյանքիս նեղությունները.

⁹չես հանձնի ինձ թշնամուս ձեռքը,

բաց ու ընդարձակ վայրերում կառաջնորդես քայլերս:

***

¹⁰Ողորմիր ինձ, ո՜վ Տեր,

նեղության մեջ եմ ես.

վիշտը սպառում է աչքերս,

կոկորդս ու աղիքներս:

¹¹Կյանքս հանգչում է տրտմության մեջ,

տարիներս՝ տառապանքի մեջ.

պատժից տկարանում է իմ ուժը

և մաշվում են իմ ոսկորները:

¹²Բոլոր հակառակորդներիս ծաղրի առարկան եմ,

մինչև իսկ՝ ինձ մոտիկների.

սարսափ եմ ազդում իմ ծանոթներին,

ով տեսնում է ինձ՝ ինձնից խուսափում է.

¹³ինչպես մի մեռյալ, սրտից մոռացված,

դարձել եմ թափվելիք ավելցուկ:

¹⁴Ես լսում եմ ամբոխի զրպարտությունները,

ահ ու դող չորսբոլորս.

խորհուրդ են անում իմ դեմ,

համաձայնվում են սպանել ինձ:

¹⁵Բայց ես վստահում եմ Քեզ, Տեր,

ասում եմ Քեզ. «Աստված իմ».

¹⁶իմ օրերը Քո ձեռքում են,

թշնամիներից ու հալածիչներից ազատիր ինձ:

¹⁷Ծառայիդ հայտնիր Քո երեսը,

փրկիր ինձ սիրույդ համաձայն.

¹⁸Տեր, թող ես ամոթով չմնամ,

քանի որ դեպի Քեզ աղաղակեցի:

Ամոթով թող մնան չարագործները,

դժոխքի լռության մեջ.

¹⁹թող համր մնան շրթունքները,

որ բարկությամբ, արհամարհանքով ու հպարտությամբ

զրպարտում են արդարին:

***

²⁰Որքա՜ն մեծ է սերդ,

այն վերապահում ես Քեզնից երկնչողներին,

այն բոլորի առաջ բաշխում ես

Քեզ ապավինողներին:

²¹Թաքցնում ես նրանց դեմքիդ ծածկույթի ներքո,

մարդկանց խարդախություններից հեռու.

պատսպարում ես նրանց վրանիդ ներսում,

լեզուների վիճաբանություններից հեռու:

²²Օրհնյալ թող լինի Տերը.

Նրա սերն իմ համար հրաշքներ է գործում,

նաև երբ քաղաքը պաշարված է:

²³Սարսափահար, ասում էի.

«Բացառված եմ Քո ներկայությունից».

Դու, սակայն, լսեցիր իմ աղաչանքը,

դեպի Քեզ ուղղված աղաղակիս ձայնը:

²⁴Սիրեցեք Տիրոջը, դուք՝ հավատացյալներ,

Տերը պաշտպանում է Իրեն վստահողներին.

բայց Նա առատ չափով հատուցում է

նրանց, ովքեր հպարտությամբ են գործում.

²⁵զորեղ եղեք, ամրապնդեցեք ձեր սրտերը,

դուք բոլորդ, որ հուսացել եք Տիրոջը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։