Սաղմոս 66 [65] - Եկեք և տեսեք Աստծո հրաշքները

Ա Ա Ա

Իսրայելն իր ծիսակատարություններում միշտ վերհիշում է անցյալի փառահեղ էջերը. Եգիպտոսից ելքն ու Հորդանանից անցնելը (6): Անցյալի իրադարձությունները մի ցուցանակ են, որն ապահովում է Աստծո ներկայությունն այսօր: Նա միշտ հայտնվում է որպես Իր ժողովրդի փրկիչը. Նա ազատում է Իր ժողովրդին թշնամիների հարձակումներով ստեղծված եղերական վիճակից, կամ թերևս խոսքը վերաբերվում է աքսորի մեծ փորձությանը (9-12): Սաղմոսի առաջին մասում տիրում է տիեզերականության ոգին. ամբողջ մարդկությունը հրավիրվում է գովաբանությամբ հռչակելու Աստծո փրկչական միջամտությունները:

Այս սաղմոսին, 13րդ տողից անդին, հետագայում ավելացվել է անձնական երախտագիտության մի աղոթք: Մի մարդ, որն ազատվել է մի մեծ փորձանքից, ընծաների մատուցմամբ երախտագիտություն է հայտնում և դա հռչակում է իր եղբայրների առաջ:

Կցորդ.		Մի պահ միայն տևող նեղության թեթևությունը մեր համար հայթայթում է անչափելի, հավիտենական փառք (հմմտ. 2Կր 4, 17):
կամ.		Աստված Ինքը, կարճատև տառապանքից հետո, կհաստատի ձեզ, կդարձնի ձեզ ուժեղ ու անսասան (հմմտ. 1Պտ 5, 10):
կամ.		Ով երկնչում է Աստծուց և կատարում է Նրա կամքը, մենք գիտենք, որ Աստված լսում է նրան (հմմտ. Հվհ 9, 31):
կամ.		Այն ամենը, որ խնդրում եք աղոթքում, հավատացեք, որ արդեն իսկ ստացել եք (հմմտ. Մրկ 11, 24):

¹Երգչախմբի ղեկավարի համար: Երգ: Սաղմոս:

Աղաղակեցեք առ Աստված, բոլոր երկրներ,

²երգեցեք Նրա Անվան փառքը,

դավանեցեք Նրա փառքը գովասանքներով:

³Ասացեք Աստծուն. «Հրաշալի են Քո գործերը,

Քո ուժի ներքո կքվում են թշնամիները.

⁴ամբողջ երկիրը երկրպագում է Քո առաջ,

երգում է Քեզ, երգում է Քո Անվանը»:

⁵Եկեք և տեսեք Աստծո հրաշքները,

զարմանահրաշ է Իր վարմունքը մարդու նկատմամբ.

⁶ծովը հաստատուն հողի փոխեց,

ոտքով անցան գետը:

Այս իսկ պատճառով, ուրախանանք Նրանում,

⁷Իր ուժի մեջ Նա տիրում է միշտ.

Նրա աչքերը զննում են հեթանոսներին,

Նրա դեմ գլուխ չեն բարձրացնում ապստամբները:

⁸Ո՜վ ժողովուրդներ, օրհնեցեք մեր Աստծուն,

հնչեցրեք Նրա գովասանքը.

⁹Նա է, որ վերստին մեզ կյանք է տալիս

և անկումից վերապահում է մեր ոտքերը:

¹⁰Ո՜վ Աստված, մեզ փորձության ենթարկեցիր,

հնոցից անցկացրեցիր մեզ, ինչպես անցկացնում են արծաթը.

¹¹Դու ես, որ առաջնորդեցիր մեզ գերության

և ծանրություն կախեցիր մեր կողերին:

¹²Կամեցար, որ մարդիկ ձիերի նման

անցնեին մեր գլուխների վրայով.

մտանք կրակի ու ջրի մեջ,

բայց հետո հանեցիր մեզ ազատության:

***

¹³Ողջակեզներով մտնելու եմ հարկերիցդ ներս,

պահպանելու եմ Քեզ խոստացված ուխտերը.

¹⁴շրթունքներիս արտասանած ուխտերը,

բերանիս արտասանածը տրտմության ժամանակ:

¹⁵Կատարյալ ողջակեզ կներկայացնեմ Քեզ,

խոյերի բուրմունքի հետ միասին,

կընծայեմ Քեզ հորթեր ու այծեր:

¹⁶Եկեք, ունկնդրեք, Աստծուն երկրպագողներ,

ձեզ կպատմեմ այն, ինչ արեց իմ համար.

¹⁷երբ աղաղակս բարձրացրեցի դեպի Ինքը,

բերանս արդեն երգում էր Նրա գովասանքը:

¹⁸Եթե կասկածը եղած լիներ իմ սրտում,

Տերը չէր լսի.

¹⁹մինչդեռ Աստված լսեց ինձ,

լսեց ու ընդունեց աղոթքի իմ աղաղակը:

²⁰Թող օրհնյալ լինի Աստված.

Նա չմերժեց իմ աղոթքը,

Նա Իր սերը չհեռացրեց ինձնից:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։