Սաղմոս 73 [72] - Խորհրդածում էի՝ հասկանալու համար

Ա Ա Ա

Թվում է, թե նրանք, ովքեր Աստծուն արհամարհում են, այս կյանքում ավելի հաջողություն են գտնում, քան արդարները: Եվ նրանց օրինակը դառնում է գայթակղություն. ուրեմն ի՞նչ իմաստ ունի հավատարիմ մնալը: Կասկածի փորձության մեջ հայտնված, հավատացյալը լույս է փնտրում Աստծուց: Նմանօրինակ խորհրդածությամբ, ահա՛, նրա հավատքը խորանում է և նորոգ ուժով արմատանում է մի համոզմունք. մարդկային փառքն ապագա չունի, մինչ Աստծո մտերմությունը միշտ թանկարժեք է մնում. այն չի կարող ո՛չ վերջանալ, ո՛չ էլ հուսախաբ թողնել: Իմաստունը, որն այստեղ արտահայտվում է, հռչակում և կանխավ ճաշակում է Տիրոջ հետ ապրելու բերկրանքը. այսպիսով գրեթե տալիս է հավիտենական երանության սահմանումը: Հոգևոր խռովքի պահերին այս սաղմոսը կարող է նոր լիցք հաղորդել մեր ներանձնական կյանքին:

Կցորդ.		Աշխարհն անցնում է իր գոռոզությամբ, բայց ով կատարում է Աստծո կամքը, մնում է հավիտյան (1Հվհ 2, 17):
կամ.		Աստված ընտրեց աշխարհի աղքատներին, նրանց հավատքով հարուստ և արքայության ժառանգորդ դարձնելու համար (հմմտ. Հկբ 2, 5):
կամ.		Տեսանելի իրականությունները վայրկենական են, անտեսանելիները՝ հավիտենական (2Կր 4, 18):
կամ.		Ով գործածում է աշխարհը, թող այնպես վարվի, որ կարծես թե չի գործածում, որովհետև այս աշխարհի տեսարանն անցնում է (1Կր 7, 31):
կամ.		Երանի՜ սրտով մաքուրներին, որովհետև նրանք տեսնելու են Աստծուն (Մտթ 5, 8):

¹Սաղմոս: Ասափի:

Աստված իսկապես բարի է Իսրայելի նկատմամբ,

մարդկանց նկատմամբ, որ մաքուր են սրտով.

²բայց քիչ էր մնացել, որ ոտքերս շեղվեին

և գրեթե սասանվում էին իմ քայլերը.

³քանի որ նախանձում էի պարծենկոտներին,

տեսնելով չարագործների հաջողությունները:

⁴Մինչև մահ՝ չեն գտնում խոչընդոտներ

և վայելում են կատարյալ առողջություն.

⁵չեն ճանաչում մարդկային հոգնությունը,

չեն հարվածվում ինչպես մյուս մահկանացուները:

⁶Հպարտությունը գրկում է նրանց ինչպես վզնոց,

բռնությունը պատում է նրանց ինչպես հագուստ.

⁷նրանց աչքը փայլում է բարօրությամբ,

նրանց սրտից առատորեն թափվում են ցանկությունները:

⁸Ծաղրում են և ծրագրում են չարիք,

վերևից սպառնում են գոռոզությամբ.

⁹իրենց բերանը բարձրացնում են մինչև երկինք,

իրենց լեզուն գայթակղեցնում է երկիրը:

¹⁰Սրա համար է ժողովուրդը հետևում նրանց,

խմելու համար ճոխության աղբյուրից.

¹¹նրանք մտածում են. «Բայց Աստված կարո՞ղ է իմանալ,

ճանաչողություն ունի՞ Բարձրյալը».

¹²ահա, սրանք են ամբարիշտները,

մշտապես անվնաս՝ բազմապատկում են հաջողությունը:

***

¹³Մի՞թե ի զուր սիրտս մաքուր պահեցի,

անմեղության մեջ լվացի ձեռքերս.

¹⁴ինչո՞ւ եմ ամբողջ օրը խրախուսում ինքս ինձ,

ուղղում եմ ինքս ինձ առավոտից ի վեր.

¹⁵բայց եթե ասեի. «Վարվելու եմ նրանց պես»,

կդավաճանեի որդիներիդ սերնդին:

¹⁶Հայնժամ խորհրդածեցի՝ ըմբռնելու համար,

թե ի՞նչ հոգնություն ծանր թվաց աչքերիս առաջ,

¹⁷մինչև որ մտա Աստծո գաղտնիքներից ներս

և հասկացա, թե ինչպիսին է լինելու նրանց վախճանը.

¹⁸նրանց դրել ես սայթաքեցուցիչ վայրերի վրա

և նրանց արդեն իսկ դեպի կործանում ես քաշում:

¹⁹Ահա նրանք սարսափում են մի վայրկյանում,

վերջացած, սպառված են վախից.

²⁰ինչպես երազը զարթնումի պահին, Տեր,

առավոտյան անէացնում ես նրանց կերպարանքը:

²¹Սիրտս կարծրացել էր

և տառապում էի ներաշխարհումս.

²²իսկապես հիմար էի և չէի հասկանում,

Քո առաջ նման էի անասուն կենդանու:

***

²³Բայց ես միշտ մնում եմ Քո հետ,

իսկ Դու բռնել ես իմ ձեռքը.

²⁴առաջնորդում ես ինձ ծրագրերիդ համաձայն,

իսկ հետո՝ ընդունելու ես ինձ փառքիդ մեջ:

²⁵Ուրիշ ո՞ւմ իմ համար կունենամ երկնքում:

Քո հետ, ուրիշ ոչինչ չեմ փափաքում երկրի վրա.

²⁶եթե մարմինս ու սիրտս սպառվում են,

Աստված իմ բաժինն է, վեմը իմ սրտի:

²⁷Ով հեռանում է Քեզնից, մոլորվում է,

Դու կործանում ես անհավատարիմ դարձողներին.

²⁸իմ համար բարիքը Աստծո մոտ մնալն է,

Տեր Աստծո վրա իմ հույսը դնելը

և Իր բոլոր գործերը պատմելը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։