Սաղմոս 45 [44] - Աստված, Քո Աստվածն օծեց Քեզ

Ա Ա Ա

Այս սաղմոսը, որն իր տեսակի մեջ միակն է ամբողջ Սաղմոսարանում, թերևս շարադրվել է թագավորական ամուսնության կապակցությամբ: Սկսվում է թագավորին ուղղված գովաբանությամբ, ապա երգահանը մեր աչքերի առջև պատկերում է ամբողջ արարողությունը: Նախևառաջ նա պանծացնում է թագավորին, որին ներկայացնում է որպես մի նոր Դավիթ, որպես Օծյալը, որի մասին խոսում է Եսայի Մարգարեն (Ես 9, 5-6; 11, 3-5). նրանում կատարվում են թագավորական տոհմին տրված աստվածային խոստումները (2Սմ 7, 11-16): Ապա հետևում են թագուհուն ուղղված խոսքերը (11-17). երգահանը գովերգում է ընտրված հարսնացուին, որն, ի միջի այլոց, օտարերկրացի է. նա հառաջ է ընթանում իր արքայական փեսայի աջին, հարուստ հանդերձանքով զգեստավորված և ընծաներով ճոխացած. նրան առաջնորդում են դեպի թագավորական պալատը, պարմանուհիների ուղեկցությամբ, մինչ նրան նվիրում են բարեմաղթական պսակը:

Արքայական ամուսնության արարողությունից անդին, այս սաղմոսում ներկայացվում է ամբողջովին ա՛յլ տեսակի միության մարգարեական պատկերը: Մարգարեներն արդեն խոսել էին Աստծո և Իր ժողովրդի միջև հոգևոր նշանադրության մասին (Ովս 2, 16; Եզ 16, 8...; Ես 62, 5). համարձակ պատկեր է, անշուշտ, բայց ծայր աստիճան հարուստ: Մեկնաբանելով մարգարեական ոգի ունեցող այս գեղեցիկ տաղերը, Հին Ուխտի վարդապետները կանխազգում էին այն Նոր Ուխտը, որը գալիք Մեսիան հաստատելու էր, ընդարձակելով այն և տարածելով նաև հեթանոս ժողովուրդների վրա: Քրիստոնեական ավանդությունը այս սաղմոսում միշտ տեսել է Քրիստոսի և Եկեղեցու միջև միության մարգարեական ավետումը (Մտթ 9, 15; 22, 9; Հվհ 3, 29; 2Կր 11, 2; Եփս 5, 22; Հյտ 19, 9; 21, 2), այն նոր ու վերջնական դաշինքի, որը տարածված է բոլոր ժողովուրդների վրա:

Կցորդ.		Իսկ Որդուն ասում է. «Քո աթոռը, ո՜վ Աստված, հավիտյանս հավիտենից է» (Եբր 1, 8):
կամ.		Այս խորհուրդը մեծ է և վերաբերվում է Քրիստոսին ու Եկեղեցուն (հմմտ. Եփս 5, 32):
կամ.		Նշանեցի ձեզ մեկ միակ Փեսայի, ներկայացնելու համար ձեզ Քրիստոսին որպես անարատ կույսեր (2Կր 11, 2):
կամ.		Ահա, հասել է Գառան հարսանիքի օրը. Նրա հարսը պատրաստ է, փառահեղ զգեստներ հագած (հմմտ. Հյտ 19, 7-8):
կամ.		Քրիստոսը սիրեց Եկեղեցուն և նրա համար նվիրեց Իր Անձը, որպեսզի Իր առջև կանգնեցնի ամբողջովին փառքով պատված (հմմտ. Եփս 5, 25.27):

¹Երգչախմբի ղեկավարի համար: «Շուշաններ»ի վրա: Կորխի որդիների:

Մասքիլ: Սիրո երգ:

²Սրտիցս բխում են գեղեցկության խոսքեր,

Մեսիա Թագավորի առաջ երգում եմ իմ բանաստեղծությունը.

լեզուս նման է արագ գրագրի գրչին:

³«Մարդկանց որդիների մեջ ամենագեղեցիկը Դու ես,

Քո շրթունքներից հեղվում է շնորհ,

որովհետև Աստված հավիտյան օրհնեց Քեզ:

⁴Ո՜վ հզոր, գոտեպնդվիր սրով,

փառքով ու վայելչությամբ հառաջացիր ու հաղթանակիր,

⁵նժույգիդ հեծիր՝ ճշմարտության, հեզության ու արդարության համար:

Քո աջը սովորեցնի քեզ հրաշալի գործեր,

⁶Քո առաջ, նետերիդ հարվածներով, ընկնեն հեթանոսները,

Մեսիա Թագավորի թշնամիները, սրտից խոցված:

⁷Քո գահը, ո՜վ Աստված, տևում է ընդմիշտ, հավիտյան,

արքայությանդ գավազանը արդարության գավազան է,

⁸Դու սիրում ես արդարությունը և ատում՝ անօրենությունը:

Այս իսկ պատճառով օծեց քեզ, Աստված, Քո Աստվածը,

բերկրանքի օծմամբ նախընտրեց Քեզ Քո ընկերներից,

⁹զգեստներդ ամբողջ մյուռոն, ալոե ու կասիա են բուրում:

Փղոսկրյա պալատներում ուրախացնում են Քեզ համերգները,

¹⁰նախասիրյալներիդ մեջ կան թագավորների դստրեր.

Քո աջին կանգնած է Կինը, Օֆիրի ոսկիներով զարդարված»:

***

¹¹«Լսիր, ո՜վ դուստր, նայիր և ականջ դիր.

մոռացիր քո ժողովուրդը և քո հոր տունը,

¹²որովհետև Մեսիա Թագավորը ցանկացել է քո գեղեցկությունը:

Նա է քո Տերը, ո՜վ դուստր Տյուրոսի,

¹³երկրպագիր Նրան և ժողովրդի մեծամեծները

ընծաներով կխնդրեն քո ժպիտը»:

¹⁴Ահա, թագավորի դուստրը մտնում է իր փառքի մեջ,

ոսկեհյուս կտավներով հանդերձավորված.

¹⁵այլևս պատրաստ՝ առաջնորդվում է Մեսիա Թագավորի առաջ:

Իր կույս ընկերուհիներն իր ետևից շքախումբ են կազմում,

¹⁶երգով և ուրախությամբ ընկերանում են նրան մինչև Քո մոտ,

տոնակատարությամբ մտնում են արքայական հարկից ներս:

¹⁷«Հայրերիդ փոխարեն կլինեն քեզ որդիներ,

նրանց իշխաններ կկարգես ամբողջ երկրի վրա.

¹⁸սերնդե սերունդ հիշել կտամ անունդ,

ժողովուրդներն հավիտյանս հավիտենից օրհնելու են քեզ»:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։