Սաղմոս 68 [67] - Պարգևների անձրև էիր հեղում

Ա Ա Ա

Սաղմոսերգուի խոսքերով սկսվում է Տապանակի տեղափոխման թափորը, ինչպես այն ժամանակ, երբ Տապանակն առաջնորդում էր ժողովրդի հառաջխաղացումը (թիվ 2; հմմտ. Թց 10, 35): Սաղմոսերգուն մեր աչքերի առջևով անցկացնում է Իսրայելի ամբողջ պատմությունը որպես Աստծո հաղթական ընթացքը, որպես Նրա թափորը մինչև Երուսաղեմի սիրտը: Աստված ոտքի է կանգնում, խավարը փարատվում է. Նա գլխավորում է Իր ժողովրդին, հակառակորդները դրանից սարսափում են: Այս տաղը լիաձեռն հավաքում է ամենատպավորիչ պատկերները, որոնք մեր համար սակայն մեծ մասամբ մնում են անորոշ: Աստծո այդ գալստյան մեջ, այնուամենայնիվ, կարող ենք ճանաչել Իսրայելի պատմության որոշակի պահերը. Եգիպտոսից ելքը և աստվածային հայտնությունը Սինայում (թիվ 8-9; հմմտ. Ել 19, 16), ելքի ժամանակ կատարված հրաշքները (թիվ 10-11), Դատավորների ձեռնարկները (թիվ 12-15), Երուսաղեմի գրավումը (թիվ 15-19), և այլն:

Աստծո հաղթական ընթացքի մեջ, որը բարձրանում և տիրում է Երուսաղեմի սրբազան բլրանը, Պողոս Առաքյալը տեսնում է մարգարեական պատկերը Հիսուս Քրիստոսի հաղթական ընթացքի, որն Իր ետևից տանում է փրկվածների ժողովրդին՝ Եկեղեցուն, որին ճոխացրել է Սուրբ Հոգու պարգևներով (թիվ 19; հմմտ. Եփս 4, 8-11): Այս սաղմոսն աղոթելով, քրիստոնյան հիշում է Աստծո ներկայությունը աշխարհի իրադարձություններում և մարդկության պատմության ներսում, որն Աստծո կողմից շարունակ կանչվում է հասնելու հավիտենական փառքին:

Կցորդ.		Մեծ զորությամբ Առաքյալները վկայում էին Տեր Հիսուսի հարությունը (Գրծ 4, 33):
կամ.		Աճապարանքով հեռանալով գերեզմանից, կանայք վազեցին ավետիսը տալու աշակերտներին (հմմտ. Մտթ 28, 8):
կամ.		Համբառնալով երկինք, Իր հետ տարավ բանտարկյալներին, պարգևներ բաշխեց մարդկանց (Եփս 4, 8):

¹Երգչախմբի ղեկավարի համար: Դավթի: Սաղմոս: Երգ:

²Թող ոտքի ելնի Աստված, թող ցրվեն Իր թշնամիները,

հակառակորդները թող փախչեն Իր երեսից,

³անհետանան ինչպես ծուխը քամու առաջ:

Ինչպես հալվում է մոմը կրակի առաջ,

թող Աստծո առաջ կորստյան մատնվեն ամբարիշտները.

⁴իսկ արդարները առատորեն լցվեն զվարթությամբ,

Աստծո առաջ ցնծան ուրախությամբ:

⁵Երգեցեք Աստծուն, շարականներ երգեցեք Նրա Անվանը,

բացեք ճանապարհը Նրա առաջ, ով հառաջանում է անապատում,

ցնծացեք Նրա համար. Նրա Անունը Տեր է:

⁶Հայր որբերի և պաշտպան այրիների,

Աստված բնակվում է Իր Սրբության վայրում.

⁷տուն է պարգևում Աստված միայնակյացներին,

արգելափակվածներին դուրս է հանում բանտից,

միայն ապստամբներն են չոր երկրում մնում:

⁸Երբ դուրս էիր գալիս Քո ժողովրդի առաջ,

երբ հառաջանում էիր անապատում, ո՜վ Աստված.

⁹դողաց երկիրը, խռովվեց երկինքը,

Աստծո առաջ, Սինայի Աստծո,

Աստծո առաջ, Իսրայելի Աստծո:

¹⁰Պարգևների անձրև էիր հեղում, Աստված,

կազդուրելով Քո ժառանգությունը, որ նվաղում էր.

¹¹Քո ժողովուրդը մի օթևան գտավ, Աստված,

Քո կողմից պատրաստված՝ ի սեր աղքատի:

***

¹²Տերը բարի լուր է տալիս,

բազմաթիվ են շարքերը ավետարանիչների.

¹³«Թագավորներն ու բանակները փախչում են, փախչում,

բանակատեղում բաժանվում է ավարը:

¹⁴Ինչո՞ւ եք դուք հանգստանալու մնում,

երբ Աղավնին արծաթապատում է Իր թևերը

և Նրա փետուրները ծածկվում են ոսկով.

¹⁵երբ Հզորը ցիրուցան է անում թագավորներին

և ձյուն է տեղում խավար լեռան վրա»:

¹⁶Բարձր լեռը Աստծո՞ լեռն է,

բարձր լեռը մի հպարտ լեռ է.

¹⁷ինչո՞ւ եք նախանձում, ո՜վ հպարտ լեռներ,

Աստծուց որպես օթևան ընտրված լեռանը,

ուր Տերը բնակվելու է հավետ:

¹⁸Աստծո զորությունները հազարավոր են ու բյուրապատիկ,

Տերը Սինայից գալիս է Իր Սրբավայր.

¹⁹բարձրացար վերև, տանելով գերիներ,

մարդկանցից ստացար պարգևներ.

պարգևներ ստացար նաև ապստամբներից

և հաստատեցիր բնակավայրդ, Տեր Աստված:

²⁰Հավետ օրհնյալ է Տեր Աստված,

Նա մեզ բերում է փրկությունը.

²¹Աստված մեր համար փրկող Աստված է,

Տեր Աստված իշխանություն ունի մահվան վրա.

²²բայց Աստված ջախջախում է Իր թշնամիների գլուխները,

գոռոզ գլուխը, որ ապրում է ոճիրի մեջ:

²³Ասում է Տերը. «Նրանց ետ կդարձնեմ բարձունքներից,

նրանց ետ կդարձնեմ ծովի անդունդներից.

²⁴որպեսզի ոտքերդ նրանց արյան մեջ լվաս

և քո շները լափեն թշնամիներին»:

***

²⁵Ո՜վ Աստված, ահա երևում է Քո շքախումբը,

Թագավորի՝ իմ Աստծո շքախումբը Սրբավայրում է.

²⁶առջևում՝ երգիչները, ետևում՝ կիթառահարները,

պատանի աղջիկների միջև, որ հնչեցնում են թմբուկները:

²⁷Հավաքույթում օրհնեցեք Աստծուն,

Տերը Իսրայելի աղբյուրն է.

²⁸այնտեղ է Բենիամինը, ամենափոքրը, որ առաջնորդում է նրանց,

Հուդայի գլխավորներին ու նրանց բանակներին,

Զաբուղոնի ու Նեփթաղիմի իշխաններին:

²⁹Ո՜վ Աստված, զորությանդ նշաններ տուր,

հաստատիր, ո՜վ Աստված, այն ամենը, որ արել ես մեր համար.

³⁰տաճարիդ համար, Երուսաղեմում,

Քեզ թագավորներն ընծաներ կբերեն:

³¹Սանձիր գազանին, որ հարձակվում է,

ավազակախմբին, որ տիրում է ժողովուրդների վրա,

որ երկրպագում է արծաթե կուռքերի առաջ.

ցիրուցան արա ժողովուրդներին, որոնք սիրում են պատերազմը,

³²և կգան Եգիպտոսի մեծերը,

Եթովպիան իր ձեռքերը կտարածի դեպի Աստված:

³³Երգեցեք Աստծուն, երկրի թագավորություններ,

օրհնություններ երգեցեք Տիրոջը.

³⁴Նա նժույգին է հեծնում հավիտենական երկնքում,

հնչեցնում է Իր հզոր ձայնը:

³⁵Ճանաչեցեք Աստծո ուժը.

Նրա պայծառ փայլը Իսրայելի վրա է,

Նրա զորությունը՝ երկնային բարձունքներում:

³⁶Ահավոր է Աստված Իր Սրբավայրում,

Նա է Իսրայելի Աստվածը.

Իր ժողովրդին տալիս է ուժ և զորություն,

թող միշտ օրհնյալ լինի Աստված:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։