Սաղմոս 55 [54] - Կա մեկը, որ խզել է Ուխտը

Ա Ա Ա

Սաղմոսերգուն, բարեպաշտ ու զգայուն, ներկայացնում է իր անսահման վիշտը, նկարագրելով իր սրտի տառապանքը, որովհետև մեկն է, որին հանիրավի զրպարտում են, մեկն է, որ տրտմում է տեսնելով Սուրբ Քաղաքում տիրող ապականությունը, մեկն է, որին դավաճանել ու լքել է իր լավագույն ընկերը: Ա՜հ, երանի՜ թե կարողանար փախչել իրեն շրջապատող այդ թշվառ կացությունից: Կարդալով այս սաղմոսը, մեր աչքերի առջև ուրվագծվում է Երեմիա Մարգարեի պատկերը, որին հալածում էին իր հակառակորդները (Եր 4, 19; 5, 1; 6, 6; 9, 1.3.7), և Հիսուսը, վշտակրությունների մարդը, որին դավաճանեց Իր մտերիմներից մեկը (Մտթ 26, 21-23):

Այս սաղմոսը կարող է մեր աղոթքը դառնալ այն օրերում, երբ մեզ մի տեսակ կոտրված ենք զգում կյանքում պատահող պայքարներից, մարդկանց և դեպքերի հարուցած հակառակություններից: Այդպիսի դեպքերում թերևս կուզենայինք խուսափել և փախչել մեր մարդկային գոյավիճակից, ապաստան գտնել ինչ որ մի անկյունում, բոլորից հեռու, ոչ մեկի երեսը չտեսնելու համար: Բայց միմիայն Աստծո ներկայությունը կարող է ազատել սեփական տառապանքի ճիրաններում բանտարկված սիրտն ու հոգին:

Կցորդ.		Հիսուսը սկսեց վախ ու տրտմություն զգալ և ասաց. «Հոգիս տխուր է մահու չափ» (հմմտ. Մրկ 14, 33-34):
կամ.		Հիսուսը խռովվեց հոգով և ասաց. «Ձեզնից մեկը ինձ մատնելու է» (հմմտ. Հվհ 13, 21):
կամ.		Եղբայրը եղբորը մահվան է մատնելու և բոլորի կողմից ատվելու եք իմ Անվան պատճառով (հմմտ. Մրկ 13, 12-13):

¹Երգչախմբի ղեկավարի համար: Լարային գործիքների վրա:

Մասքիլ: Դավթի:

²Լսիր, ո՜վ Աստված, աղոթքս,

մի՛ անտեսիր իմ աղաչանքը.

³ուշադրություն դարձրու վրաս և պատասխանիր ինձ,

տխուր եմ, անձկությամբ լի:

⁴Խռովվել եմ թշնամու աղաղակից,

չարագործի նախատինքներից.

ամեն ոճիր բարդում են վրաս,

բարկությամբ մեղադրում են ինձ:

⁵Սիրտս գալարվում է ներսումս,

մահվան սարսափն է վրաս հարձակվում.

⁶երկյուղն ու վախը ներթափանցում են իմ մեջ,

զարհուրանքը պատում է անձս:

⁷Ասում եմ ինքս ինձ. «Ո՞վ կտա ինձ աղավնու թևեր,

կթռչեի ինձ ապաստան գտնելու.

⁸կփախնեի հեռու, հեռո՜ւ,

անապատում կհաստատեի բնակությունս.

⁹աճապարանքով կհասնեի մի ապաստանի,

կթաքնվեի փոթորկալի քամուց»:

¹⁰Շփոթություն դիր նրանց խոսվածքի մեջ,

ցիրուցան արա նրանց, Տեր.

միայն բռնություն ու անհամաձայնություններ եմ տեսնում

քաղաքի սրտում.

¹¹դրանք օր ու գիշեր չափում անցնում են

քաղաքի բոլոր պարիսպները:

Նրանում՝ ոճիր ու անարդարություն,

¹²նրա ծոցում՝ ավեր ու կործանում.

այլևս չեն լքում նրա փողոցները

իշխանության զեղծումն ու խաբեությունը:

¹³Եթե թշնամի մեկը լիներ ինձ նախատողը,

կկարողանայի կրել.

եթե ոսոխը դուրս գար իմ դեմ,

կկարողանայի թաքնվել:

¹⁴Բայց դու ես, մարդ, իմ ընկերը,

իմ մտերիմն ու խորհրդակիցը.

¹⁵մի սերտ մտերմություն միացնում էր մեզ,

ճաշակում էինք նրա քաղցրությունը.

միասին համաձայն ընթանում էինք

Աստծո օթևանների ներսում:

¹⁶Թող անակնկալ մահը հանկարծակիի բերի նրանց,

ողջ ողջ թող իջնեն դժոխք.

քանի որ չարիքը նրանց տներում է,

լիուլի լցնում է նրանց ծոցը:

***

¹⁷Իսկ ես աղաղակում եմ իմ Աստծուն,

Տերը փրկում է ինձ.

¹⁸երեկոյան, առավոտյան, կեսօրին,

ես հառաչում եմ ու լալիս:

Նա լսում է իմ աղոթքը,

¹⁹վերստին խաղաղություն է պարգևում ինձ.

ազատում է ինձ նրանցից, ովքեր մարտնչում են իմ դեմ,

իմ բոլոր թշնամիներից:

²⁰Այո՛, Աստված լսում է և պատասխանում,

Նա, որ թագավորում է հավետ.

քանի որ նրանց հոգիներում չկա դարձ,

Աստծուց չեն երկնչում:

²¹Կա մեկը, որ իր ձեռքը տարածել է ընկերոջ դեմ,

խզել է Ուխտը.

²²ցույց է տվել խաբեական մի դեմք,

բայց իր սիրտը պատերազմ էր.

նրա խոսքերը զմայլելի էին, անուշահոտ բուրմունքից ավելի,

բայց դաշույններ էին:

²³Հոգսդ Տիրոջը հանձնիր

և Նա քեզ թիկունք կկանգնի.

Նա երբեք չի կարող թույլատրել

արդարի անկումը:

²⁴Դու, ո՜վ Աստված, նրանց գերեզման կիջեցնես,

արյունահեղներին ու խաբեբաներին.

իրենց օրերի կեսին չեն հասնի,

բայց ես վստահում եմ Քեզ:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։