Սաղմոս 91 [90] - «Տրտմության մեջ ես նրա հետ եմ լինելու»

Ա Ա Ա

Սաղմոսերգուն այստեղ կանգ չի առնում նկարագրելու սեփական երջանկությունը, այլ՝ դիմում է նրանց, ովքեր ապավինում են Ամենակալի պաշտպանությանը: Նրանց դիմում է նրանց վստահեցնելու և խրախուսելու համար, հաստատելով, որ ոչինչ չի կարող չարիք պատճառել նրանց: Հրեշտակները պահապան են նրանց և հավիտենական կյանքի նրանց փափաքը գոհացվելու է:

Ավետարանական պատմության համաձայն, սատանան այս սաղմոսի խոսքերից մի քանիսն է գործածել (11-12) Հիսուսին համոզելու համար, որպեսզի Տաճարի աշտարակից վար նետվելով փորձի Աստծուն (Մտթ 4, 6): Այդպես վարվելով, սատանան փորձում էր խեղաթյուրել սաղմոսի և Աստծո հանդեպ վստահության ճշմարիտ իմաստը. կամենում էր, որ Հիսուսը մի հրաշք պահանջեր, Հայր Աստծուց ստանալու համար Իր պաշտպանության երաշխիքը:

Այս սաղմոսի խոսքերով աղոթելով չենք ստանալու մոգական ազատում կյանքի դժվարություններից ու վտանգներից, այլ՝ սովորելու ենք, թե ի՛նչ է նշանակում վստահել Աստծուն: Յուրաքանչյուր մարդ, դեպի երկինք և դեպի Աստված ուղղված իր ընթացքում, մի պանդուխտ է, ուխտագնաց, ճանապարհորդ: Նրա ընթացքը ոչնչով նման չէ հովվերգական երազի, այլ՝ ենթակա է նաև վտանգների, բայց Տերն ազատում է նրան վախից, նրան առաջնորդելու համար դեպի փրկությունը, դեպի Իր հետ ապրված կյանքը:

Հանդարտ ու անդորր վստահությունը, որով ամբողջովին համակված է այս սաղմոսը, ծնունդ է տվել հնագույն ավանդությանը՝ այն աղոթելու երեկոյան, արևամուտին կամ պառկելուց առաջ:

Կցորդ.		Հիսուսը քառասուն օր փորձվեց սատանայից, մնում էր գազանների հետ և հրեշտակները ծառայում էին իրեն (հմմտ. Մրկ 1, 13):
կամ.		Աստված հավատարիմ է և չի թույլատրի, որ փորձվեք ձեր ուժերից վեր (1Կր 10, 13):
կամ.		Աստված փորձությունների հետ կտա նաև դիմադրելու ուժը (հմմտ. 1Կր 10, 13):
կամ.		Ձեզ իշխանություն եմ տալիս ոտնակոխ անելու օձերին ու կարիճներին և թշնամու բոլոր զորություններին (հմմտ. Ղկս 10, 19):
կամ.		Հրեշտակներն առաքվում են ծառայելու նրանց, ովքեր ժառանգելու են փրկությունը (հմմտ. Եբր 1, 14):

¹Դու, որ բնակվում ես Բարձրյալի մտերմությամբ,

գիշերն անցկացնում ես Հզորի հովանու ներքո.

²ասա Տիրոջը. «Ապավեն իմ, ուժ իմ,

իմ Աստված, որի մոտ ես ապահով եմ»:

³Կփրկի քեզ որսորդի ցանցից,

մահաբեր ծանր հիվանդությունից.

⁴Իր թևերով Նա ծածկում է քեզ,

դու ապաստան ես գտնում Իր փետուրների ներքո,

Նրա հավատարմությունը զրահ է ու վահան:

⁵Չես վախենա գիշերվա սարսափներից,

նետից, որ թռչում է ցերեկը.

⁶ժանտախտից, որ հառաջանում է խավարի մեջ,

պատուհասից, որ հարվածում է կեսօրին:

⁷Հազարներ կընկնեն քո կողքին,

բյուրավորներ կընկնեն քո աջին,

բայց ոչինչ չի կարողանա վնասել քեզ:

⁸Բավական է, որ բացես աչքերդ

և կտեսնես չարագործների հատուցումը.

⁹այո՛, Տերը քո ապավենն է,

դու Բարձրյալի մեջ ես հաստատել քո բնակությունը:

¹⁰Դժբախտությունը չի կարող ընկնել քո վրա,

ո՛չ էլ չարիքը՝ մոտենալ քո վրանին.

¹¹քո մասին հրամայել է Իր հրեշտակներին,

որպեսզի պահպանեն քո բոլոր ճանապարհները:

¹²Նրանք կրելու են քեզ իրենց ձեռքերի վրա,

որպեսզի ոտքդ չխփես քարին.

¹³կանցնես իժերի ու կարիճների վրայով,

ոտնակոխ կանես առյուծին և օձին:

¹⁴«Ես փրկելու եմ նրան, որովհետև իր անձը վստահել է Ինձ,

Ես փառավորելու եմ նրան, որովհետև ճանաչում է Իմ Անունը.

¹⁵նա կանչելու է Ինձ և Ես պատասխանելու եմ նրան,

տրտմության մեջ ես նրա հետ եմ լինելու:

Ազատելու եմ նրան և ծածկելու եմ փառքով,

¹⁶կյանքի երկար օրերով հագեցնելու եմ նրան,

շնորհելու եմ նրան տեսնել Իմ պարգևած փրկությունը»:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։