Սաղմոս 105 [104] - Աստված հավատարիմ է Իր խոսքին

Ա Ա Ա

Արարչագործության հանդիսավոր տաղերգությունը (Սաղմոս 104) բավական չէ հավատացյալի համար. Աստված Նա է, որն իջնում է մարդկանց մեջ. Նա Իր մեծությունը հռչակում է պատմության մեջ, մարդկությունը ստրկությունից ազատագրելով, առաջնորդելու համար դեպի փրկությունը: Իր բերկրանքն ու երախտագիտությունը երգելու համար, Հին Ուխտի ժողովուրդը սիրում է վերհիշել անցյալի իրադարձությունները, որոնք իր պատմության սկիզբն են հանդիսացել. Աբրահամին տրված խոստումը, որը վերահաստատվում է Նահապետների հետ (8-15), Հովսեփի պատմությունը (16-23; Ծնդ 37-50), Մովսեսն ու Եգիպտոսի պատիժները (24-36; Ել 1-13), ելքն ու անապատում կատարված հրաշքները (37-43; Ել 14-15), և ի վերջո՝ ժամանումը Քանաան, որպես ժառանգություն խոստացված երկիրը (44): Ի տարբերություն հաջորդ սաղմոսի, այստեղ չի խոսվում Իսրայելի մեղքերի մասին: Այս սաղմոսի հեղինակը կամենում է երգել միմիայն Աստծո գործերը: Տերը միշտ հավատարիմ է եղել Իր խոսքին. Նա բազմաթիվ հրաշքներ է կատարել ի նպաստ Իր ծառաների և Նրա նախախնամությունն առաջնորդել է նրանց քայլերը. ուստի իրավունքն ունի պահանջելու նրանց հավատարմությունը (45):

Ահա, հետևաբար, փրկության պատմության էական պահերը. ընտրությունն ու Զատիկը (տե՛ս Եփս 1): Յուրաքանչյուր մարդու կյանքին ծանոթ են կոչման ժամերը և ազատագրման ժամերը, ժամերն Աստծո, որոնք բերկրանքի աղբյուր են և հավատարմության պահանջ:

Այս սաղմոսի առաջին 15 տողերը գտնվում են նաև Մնացորդաց Առաջին գրքի 16րդ գլխի 8-22 հատվածում:

Կցորդ.		Իսկապես Աստծո բոլոր խոստումներն իրականացան Հիսուս Քրիստոսի մեջ (հմմտ. 2Կր 1, 20):
կամ.		Ո՛չ թե Մովսեսը երկնքից հաց տվեց ձեզ, այլ՝ իմ Հայրն է տալիս ձեզ ճշմարիտ հացը (հմմտ. Հվհ 6, 32):
կամ.		Մեր հայրերը խմում էին մի ժայռից, և այդ ժայռը Քրիստոսն Ինքն էր (հմմտ. 1Կր 10, 4):
կամ.		Աշխատեցեք միշտ ավելի ամուր դարձնել ձեր կոչումը և ձեր ընտրությունը (2Պտ 1, 10):

¹Գովեցեք Տիրոջը, կանչեցեք Նրա Անունը,

ժողովուրդների մեջ ավետարանեցեք Նրա գործերը.

²երգեցեք և նվագեցեք Նրա համար,

պատմեցեք Նրա հրաշագործությունները.

³արբեցեք սրբության Նրա Անունով,

թող ուրախանա Տիրոջը փնտրողի սիրտը:

⁴Փնտրեցեք Տիրոջը և Նրա ուժը,

անդադար փնտրեցեք Նրա երեսը.

⁵հիշեցեք հրաշքները, որ գործեց,

Նրա սքանչելիքներն ու Նրա բերանի վճիռները.

⁶դուք, Աբրահամի՝ Նրա ծառայի սերունդ,

դուք, Հակոբի որդիներ, Նրա ընտրյալներդ:

⁷Այո՛, Տերը մեր Աստվածն է,

Նրա վճիռներն ամբողջ երկրի վրա են.

⁸մշտապես հիշում է Իր դաշինքը,

հազարավոր սերունդների համար տրված խոսքը:

⁹Աբրահամի հետ կնքված ուխտը,

Իսահակին վստահեցված երդումը.

¹⁰այն որպես օրենք հաստատեց Հակոբի համար,

հավիտենական խոստում՝ Իսրայելին ի նպաստ.

¹¹ասելով. «Ձեզ կտամ Քանանի երկիրը,

կլինի ժառանգության ձեր բաժինը»:

***

¹²Ահա նրանք. քանակով սակավաթիվ են,

պանդուխտների միայն մի ափ.

¹³թափառում են ժողովրդից ժողովուրդ,

մի թագավորությունից դեպի տարբեր մի ժողովուրդ:

¹⁴Բայց ոչ ոքի չի թույլատրում ճնշել նրանց,

նրանց պատճառով՝ պատժում է թագավորներին.

¹⁵«Ձեռք մի՛ տվեք նրանց, ում օծել եմ,

Իմ մարգարեներին չարիք մի՛ արեք»:

¹⁶Սով է բերում երկրի վրա,

կտրելով հացի պաշարները.

¹⁷նրանց առջև առաքում է մի մարդ,

Հովսեփին, որպես ստրուկ ծախված:

¹⁸Շղթաներով սեղմում են նրա ոտքերը,

երկաթների մեջ փակում են նրա վիզը.

¹⁹նա տառապում է Տիրոջ խոսքի համար,

մինչև որ կկատարվի Նրա ավետիսը:

²⁰Եվ թագավորը հրամայում է ազատել նրան,

ժողովուրդների կառավարիչը նրան արձակում է.

²¹նրան հաստատում է իր տան տեր,

իր բոլոր բարիքների տնտես.

²²որպեսզի իշխանները ենթակա լինեն նրան,

որպեսզի իմաստուն դարձնի ծերունիներին:

²³Եվ Իսրայելն իջնում է Եգիպտոս,

Հակոբը հաստատվում է Քամի երկրում.

²⁴Տերը բազմաթիվ է դարձնում Իր ժողովուրդը,

առավել կորովի, քան իր կեղեքիչները.

²⁵ապա փոխում է սրանց սիրտը,

ատում են Իր ժողովրդին, խաբում են Իր ծառաներին:

²⁶Բայց առաքում է Իր ծառա Մովսեսին

և Ահարոնին, որին Նա ընտրել էր.

²⁷նրանց մեջ դնում է խոսքերն Իր նշանների,

Իր հրաշքների, Քամի երկրում:

²⁸Խավարն առաքում է և ամեն բան խավարեցնում,

և ոչինչ չի դիմադրում Իր խոսքին.

²⁹ջրերն արյան է փոխում

և սատկել է տալիս նրանց բոլոր ձկներին:

³⁰Նրանց երկրում վխտում են գորտերը,

մինչև նրանց իշխանավորների սենյակները.

³¹Նա խոսում է և հասնում են միջատները,

մժեղները, նրանց երկրի բոլոր սահմաններում:

³²Անձրևի փոխարեն առաքում է կարկուտը,

և կայծակներ, որ հրկիզում են արտերը.

³³հարվածում է նրանց խաղողներին ու թզենիներին,

տապալում է երկրի ծառերը:

³⁴Նա խոսում է և հասնում են մարախները,

և լափող անհամար թրթուռներ.

³⁵ոչնչացնում են բոլոր բողբոջները

և ուտում են երկրի ամեն պտուղները.

³⁶նրանց երկրում հարվածում է անդրանիկներին,

նրանց կորովի առաջին պտուղներին:

***

³⁷Նրանց դուրս է բերում արծաթով ու ոսկիով,

նրանց ազգատոհմերում հիվանդ ոչ ոք չկա.

³⁸Եգիպտոսն ուրախանում է նրանց դուրս գալով,

որովհետև իրենց վրա թափվել էր սարսափը:

³⁹Օրվա ընթացքում որպես վրան տարածում է մի ամպ,

կրակով լուսավորում է գիշերը.

⁴⁰նրանք աղաղակում են, անձրևի պես բերում է լորերին,

նրանց հագեցնում է երկնքի հացով.

⁴¹բացում է ժայռը և բխում են ջրերը,

գետերի նման հոսում են անապատում:

⁴²Մտաբերում է Իր սուրբ խոստումը,

որ կատարել էր Իր ծառա Աբրահամին.

⁴³դուրս է բերում Իր ժողովուրդը ցնծությամբ,

Իր ընտրյալներին՝ ուրախության աղաղակների միջով:

⁴⁴Պարգևում է նրանց հեթանոսների հողերը,

ժողովուրդների վաստակը՝ որպես ժառանգություն.

⁴⁵որպեսզի կատարեն Իր կամքը

և պահեն Իր պատվիրանները:

Ալելուիա:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։