Սաղմոս 52 [51] - Անձս վստահում եմ Աստծո սիրույն

Ա Ա Ա

Անպատկառ ամբարտավանությանն ու նենգ լեզուներին վերապահված է ողբերգական վախճան, մինչ արդարը դիմանալու է, քանի որ նա ապավինում է Աստծուն: Արդարին տրվում է տաճարում բնակվելու բերկրանքը, այսինքն՝ Տիրոջ ներկայությանը: Այս սաղմոսը ամենախիստ հանդիմանություններից մեկն է չարախոս լեզուների դեմ: Իր գրական ոճով մոտենում է իմաստասիրական սաղմոսներին ու գրություններին (Սղմ 57, 5; 59, 8; Հոբ 20):

Կցորդ.		Լեզուն անօրենության աշխարհն է, ապականում է մարմինը և հրդեհում կյանքը (հմմտ. Հկբ 3, 6):
կամ.		Դուք պարծենում եք ձեր գոռոզությամբ, բայց այս տեսակի ամեն պարծանք անօրենություն է (հմմտ. Հկբ 4, 16):

¹Երգչախմբի ղեկավարի համար: Մասքիլ: Դավթի:

²Երբ եկավ Դովեկ Եդոմացին, պատմելու համար Սավուղին և նրան ասելու. «Դավիթը մտել է Աքիմելեքի տունը»:

³Ինչո՞ւ ես չարիքով պարծենում, ո՜վ բռնավոր,

Աստված հավատարիմ է ամեն օր.

⁴ածելիի նման սրված լեզուդ

ոճիրներ է հրամայում, ո՜վ ստախոս:

⁵Դու չարիքը նախընտրում ես բարիքին,

կեղծիքը՝ արդարությանը.

⁶դու սիրում ես ամեն խոսք, որ քանդում է,

ո՜վ զրպարտող լեզու:

⁷Բայց ահա Աստված կկործանի քեզ,

որջիցդ դուրս կհանի, հիմքերդ խախտելու համար.

արմատախիլ կանի քեզ ողջերի երկրից,

կոչնչացնի քեզ ընդմիշտ:

⁸Արդարները, տեսնելով, երկնչելու են,

և ծիծաղելու են քո վրա.

⁹«Ահա մարդը, որ իրեն ապավեն չընտրեց Աստծուն,

այլ՝ վստահում էր իր մեծ հարստությանը,

փքվում էր ոճիրի մեջ»:

¹⁰Մինչդեռ ես, ինչպես ամբողջովին կանաչ ձիթենի

Աստծո հարկերի ներքո,

անձս վստահում եմ Աստծո սիրույն,

հավիտյանս հավիտենից:

¹¹Ես ընդմիշտ երախտագիտություն եմ մատուցում Քեզ,

որովհետև գործում ես.

հավատացյալներիդ առաջ հուսացել եմ Անվանդ,

որովհետև բարի է:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։