Սաղմոս 145 [144] - Տերը դանդաղ է զայրույթի, մեծ է սիրո մեջ

Ա Ա Ա

Հին Կտակարանի ժողովուրդը մեծ հոժարությամբ էր արտասանում այս սաղմոսը, թեև նրա շարադրողը հեղինակային իրավունքներ չունի. իրականում նա այբբենական կարգով դասավորելով միմյանց է շաղկապել տարբեր սաղմոսներից վերցված հատվածներ: Դա սակայն տարօրինակ չէ, որովհետև հրեա երգահանները սովոր էին մտքեր ու խոսքեր քաղել սրբազան երաժշտության ընդհանուր գանձարանից, փառավորելու համար Աստծուն, հաճախ միևնույն խոսքերով և միևնույն նախադասություններով: Բայց որոշակի եզրերի կրկնությունը կամ ընդգծումը նաև հնարավորություն է ստեղծում լավագույնս արտահայտելու ինչ որ մի համոզմունքի ջերմությունը: Եվ այդպիսին է նաև այս սաղմոսի պարագան: Արքայություն, անուն, զորություն, փառք, մեծություն, գործեր, հրաշքներ, սքանչելիքներ, արդարություն, բարություն, կարեկցող համբերություն, ողորմություն, գեղեցկություն, շնորհ. այս և նման եզրերի գործածմամբ սաղմոսերգուն նախ փառաբանում է Ուխտը կնքած Աստծուն, բոլոր սերունդներին կոչ անելով երգով գովաբանելու Տիրոջ հավիտենական թագավորությունը. ապա հռչակում է Աստծո բարյացակամությունը, որը դրսևորվում է պաշտպանությամբ, սննդով, փրկությամբ, որոնք Նա զանազան եղանակներով պարգևում է բոլոր նրանց, ովքեր աղերսում են Իրեն: Եվ այսպիսով սաղմոսերգուն հռչակում է Աստծո ներկայությունն աշխարհում, պատմության մեջ և կյանքում:

Կցորդ.		Աշխարհի թագավորությունը մեր Տիրոջն է և Իր Քրիստոսինը. Նա թագավորելու է հավիտյանս հավիտենից (հմմտ. Հյտ 11, 15):
կամ.		Եկեք, իմ Հոր օրհնյալներ, ժառանգեցեք ձեր համար պատրաստված արքայությունը (Մտթ 25, 34):
կամ.		Աստված խտրականություն չի դնում անձերի միջև, այլ՝ ով երկնչում է Իրենից, Իրեն հաճո է (հմմտ. Գրծ 10, 34-35):
կամ.		Ով երկնչում է Աստծուց և կատարում է Նրա կամքը, մենք գիտենք, որ Աստված լսում է նրան (հմմտ. Հվհ 9, 31):
կամ.		Մեծ և զարմանալի են Քո գործերը, արդար և ճշմարիտ են Քո ճանապարհները (հմմտ. Հյտ 15, 3):

¹Գովք: Դավթի:

Մեծարում եմ Քեզ, Աստված իմ, իմ Թագավոր,

հավիտյան օրհնում եմ Քո Անունը.

²օրհնում եմ Քեզ օրըստօրե

և հավիտյան գովում եմ Քո Անունը.

³Տերը մեծ է և արժանի է գովքի,

Նրա մեծությունն անհնարին է չափել:

⁴Մի սերունդը մյուսին պատմում է Քո գործերը,

ավետարանում է Քո սքանչելիքները.

⁵ես խորհրդածում եմ հրաշքներիդ խոսքերը,

հիանում եմ Քո գեղեցկությամբ և Քո փառքով:

⁶Պատմվում է Քո ահարկու զորությունը

և ես հռչակում եմ Քո մեծությունը.

⁷հիշվում է Քո մեծ բարությունը,

ուրախությամբ աղաղակվում է Քո արդարությունը:

⁸Տերը կարեկցող է և բազմագութ,

դանդաղ՝ զայրույթի, և մեծ՝ սիրո մեջ.

⁹Տերը բոլորի նկատմամբ բարի է,

կարեկցող է բոլոր արարածների հանդեպ:

***

¹⁰Թող գովեն Քեզ բոլոր արարածներդ,

թող օրհնեն Քեզ երկրպագուներդ, Տեր.

¹¹թող հռչակեն արքայությանդ փառքը,

թող ավետարանեն Քո սքանչելիքները:

¹²Թող մարդկանց ծանոթացնեն Քո հրաշքները,

արքայությանդ պայծառությունն ու փառքը.

¹³Քո արքայությունը հավիտենական արքայություն է,

Քո տերությունը՝ սերնդից սերունդ:

¹⁴Տերը թիկունք է կանգնում նրան, ով ընկնելու մոտ է,

կորացած ամենքին ուղղում է մեջքը.

¹⁵բոլորի աչքերը սպասում են Քեզնից

և Դու նրանց կերակրում ես իրենց ժամանակին.

¹⁶երբ բացում ես Քո առատությամբ լի ձեռքը,

Դու բարությամբ հագեցնում ես կենդանի բոլոր էակներին:

¹⁷Տերն արդար է Իր բոլոր ճանապարհներում,

հավատարիմ է Իր բոլոր գործերում.

¹⁸Տերը մոտ է ամենքին, որ կանչում են Իրեն,

ամենքին, որ կանչում են Իրեն անկեղծությամբ:

¹⁹Կատարում է Իրենից երկնչողների փափաքը,

լսում է նրանց աղաղակը և փրկում նրանց.

²⁰Նա հսկում է Իրեն սիրողների վրա,

Տերը բնաջնջում է բոլոր ամբարիշտներին:

²¹Թող իմ բերանը երգի Տիրոջ գովքը,

յուրաքանչյուր մարմին միշտ թող օրհնի Նրա սուրբ Անունը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։