Սաղմոս 107 [106] - Տիրոջ կողմից փրկվածները

Ա Ա Ա

Հավատացյալները կազմում են Աստծո ժողովուրդը: Նրանք պատկանում են տարբեր երկրների, մշակույթների ու իրավիճակների, բայց բոլորն էլ մի ընդհանուր հատկություն ունեն. փրկվել են Աստծո կողմից:

Երախտագիտության մատուցման այս օրհներգը ցույց է տալիս, թե Աստված ինչպես է տագնապալի տարբեր վիճակներից փրկել նրանց, ովքեր աղոթքով ու աղերսանքով դիմել են Իրեն. մոլորված ճանապարհորդներ (4-9), բանտարկյալներ (10-16), հիվանդներ (17-22) և նավաբեկյալներ (23-32): Տերն Իր կամքի համաձայն կարող է փոխել իրադրությունը (33-41), բայց միայն հավատացյալն է ընդունակ հասկանալու Աստծո գործերը: Նշված վտանգավոր իրավիճակներից յուրաքանչյուրի նկարագրությունն ավարտվում է մի կրկներգով, որը բոլորին կոչ է անում շնորհակալություն հայտնելու Տիրոջն Իր ողորմության համար:

Ամենևին ակնհայտ է, որ այս սաղմոսի հեղինակը ներշնչվել է «Մխիթարության գրքից» (Ես 40-55) և Աստվածաշնչի իմաստասիրական գրքերից (Հոբ, Իմս 16):

Սաղմոսը խոսում է չորս տեսակի վտանգներում հայտնված մարդկանց մասին: Այդ վտանգներում դյուրին է նշմարել յուրաքանչյուր հավատացյալի հոգևոր կյանքի հառաջընթացի խորհրդապատկերը: Ավետարանական պատմության համաձայն, Հիսուսն ասում է, որ կամենում է սփոփանք ու մխիթարություն պարգևել բոլոր նրանց, ովքեր հոգնած են ու ծանրաբեռնված. բավական է, որ մերձենան Իրեն և իրենց ուսերին վերցնեն Նրա լուծը, որ քաղցր է ու թեթև (Մտթ 11, 28): Այս սաղմոսի աղոթական ընթերցումը մեր համար միշտ կլինի մի հրավեր՝ հիշելու, որ Աստծո ողորմությունը չի դադարում ընկերակցել մեզ կյանքի բոլոր իրավիճակներում:

Կցորդ.		Մենք գիտենք, որ ամեն բան նպաստում է բարիքին նրանց, ովքեր սիրում են Աստծուն (Հռմ 8, 28):
կամ.		Երանի՜ ձեզ, որ այժմ քաղցած եք, որովհետև դուք հագենալու եք (Ղկս 6, 21):
կամ.		Երանի՜ ձեզ, որ այժմ արտասվում եք, որովհետև դուք ուրախանալու եք (Ղկս 6, 21):
կամ.		Միշտ աղոթեցեք, ամեն ինչի համար շնորհակալ եղեք. սա՛ է Աստծո կամքը ձեր համար ի Հիսուս Քրիստոս (1Թղ 5, 17-18):
կամ.		Տերը կազատի ինձ ամեն չարիքից և կփրկի ինձ Իր երկնային արքայության համար (2Տմ 4, 18):
կամ.		Հիսուսն անցավ բարեգործելով և բժշկելով, որովհետև Աստված Իր հետ էր (հմմտ. Գրծ 10, 38):

¹Երախտագիտություն մատուցեք Տիրոջը, Նա բարի է,

հավիտենական է Իր սերը.

²սա թող ասեն Տիրոջ կողմից փրկվածները,

հարստահարողի ձեռքից ազատագրվածները,

³բոլոր երկրներից ի մի ժողովվածները,

հյուսիսից և ծովից, արևելքից և արևմուտքից:

⁴Ոմանք թափառում էին անապատում, անջրդի ճանապարհներում,

առանց բնակության հարմար քաղաք գտնելու.

⁵քաղցած և ծարավից մահամերձ,

նրանց կյանքը նվաղում էր իրենց մեջ:

⁶Նեղության մեջ աղաղակում են Տիրոջը,

նրանց ազատում է իրենց վշտերից.

⁷նրանց առաջնորդում է ապահով ճանապարհի վրա,

դեպի մի քաղաք, ուր կարող են բնակվել:

⁸Թող երախտագիտություն մատուցեն Տիրոջն Իր սիրո համար,

մարդու հանդեպ գործված հրաշքների համար.

⁹որովհետև Նա հագեցնում է ծարավածներին

և բարիքներով լիացնում է քաղցածներին:

***

¹⁰Ուրիշներ բնակվում էին մահվան խավարի մեջ,

թշվառության ու շղթաների մեջ բանտարկված.

¹¹քանի որ ապստամբ էին Աստծո խոսքի դեմ,

արհամարհում էին Բարձրյալի ծրագիրը.

¹²իրենց սրտի մեջ չարչարանքից ուժասպառ,

ընկնում էին և օգնող ոչ ոք չկար:

¹³Նեղության մեջ աղաղակում են Տիրոջը,

նրանց ազատում է իրենց վշտերից.

¹⁴նրանց հանում է մահվան խավարի միջից,

գետին է գցում նրանց շղթաները:

¹⁵Թող երախտագիտություն մատուցեն Տիրոջն Իր սիրո համար,

մարդու հանդեպ գործված հրաշքների համար.

¹⁶որովհետև կոտրում է պղնձե դռները,

փշրում է երկաթե փականքները:

¹⁷Ուրիշներ ճզմված էին հանցանքների ներքո,

տառապում էին իրենց մեղքերի համար.

¹⁸մերժում էին ամեն տեսակ կերակուր,

հասել էին մահվան սեմին:

¹⁹Նեղության մեջ աղաղակում են Տիրոջը,

նրանց ազատում է իրենց վշտերից.

²⁰Նա առաքում է Իր խոսքը և բժշկում նրանց,

նրանց կյանքերն ազատում է գերեզմանից:

²¹Թող երախտագիտություն մատուցեն Տիրոջն Իր սիրո համար,

մարդու հանդեպ գործված հրաշքների համար.

²²և թող մատուցեն գովաբանության զոհեր,

ցնծությամբ թող պատմեն Նրա գործերը:

²³Ուրիշներ նավերի վրա ակոսում էին ծովը,

օվկիանոսը, իրենց աշխատանքը կատարելու համար.

²⁴վկաներ՝ Տիրոջ գործերի,

Նրա հրաշքների՝ խոր անդնդի վրա:

²⁵Նա խոսում էր և հարուցում փոթորիկ,

մի քամի, որ բարձրացնում էր կոհակները.

²⁶բարձրանում էին երկինք և ապա իջնում անդունդ,

նրանց կյանքը վրդովված էր փոթորկից.

²⁷ալեկոծվում էին, տատանվում արբածների նման,

ոչնչի չէր ծառայում նրանց վարպետությունը:

²⁸Նեղության մեջ աղաղակում են Տիրոջը,

նրանց ազատում է իրենց վշտերից.

²⁹փոթորիկը լռության է վերածում,

վերստին հանդարտություն է տալիս ծովի ալիքներին.

³⁰ուրախանում են՝ դրանք խաղաղ տեսնելով,

նրանց առաջնորդում է դեպի փափաքված նավահանգիստը:

³¹Թող երախտագիտություն մատուցեն Տիրոջն Իր սիրո համար,

մարդու հանդեպ գործված հրաշքների համար.

³²թող մեծարեն Նրան ժողովրդի հավաքում,

թող գովեն Նրան տարեցների ժողովում:

***

³³Նա գետերը անապատի է փոխում,

ջրերի աղբյուրները՝ պապակած հողի.

³⁴արգավանդ երկիրը՝ աղային տարածքի,

եթե բնակիչներն այլասերված են դառնում:

³⁵Բայց նա անապատը վերածում է լճի,

չորացած հողերը՝ ջրերի օազիսների.

³⁶այնտեղ բնակվելու է առաջնորդում քաղցածներին,

որպեսզի հյուրընկալ քաղաք կառուցեն:

³⁷Սերմանում են դաշտեր և տնկում են խաղողի այգիներ,

և ապա հավաքում են դրանց պտուղները.

³⁸օրհնում է նրանց և աճում են բազմաթիվ,

և բարգավաճում են նրանց երամակները.

³⁹նույնիսկ երբ սակավաթիվ են և քչացած՝

ամլության, հոգնության և արհավիրքների պատճառով:

⁴⁰Այլ Նա արհամարհանքը թափում է հզորների վրա,

անելանելի քաոսի մեջ մոլորեցնում է նրանց.

⁴¹Նա թշվառությունից կրկին ոտքի է կանգնեցնում աղքատին,

հոտի նման բազմապատկում է նրա սերունդը:

⁴²Արդարները տեսնում են և ուրախանում,

անարդարության բերանը պապանձվում է.

⁴³իմաստունը պահպանում է այս բաները,

նրանց մեջ հստակ տեսնում է Տիրոջ սերը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։